Израелската компанија „Ивиејшн еркрафт“ планира до 2020 година на пазарот да го извади првиот електричен комерцијален авион. Тој подвиг нема да биде евтин, а за реализацијата на Израелците ќе им бидат потребни 200 милиони долари.

- Имаме убедлива деловна стратегија. Трошокот за еден лет со нашиот авион би бил околу 200 долари, за разлика од 1.000 долари колку што е трошокот на авионот на млазен погон - објасни Омер Бар-Јохај, извршен директор на авиокомпанијата, признавајќи дека им се потребни инвестиции.

Засега тие „преживуваат“ со вложувања од мали инвеститори и финансиска поддршка од израелската влада.

„Ивиејшн“ би ги продавала авионите за 3 милиони долари, а како што вели Бар-Јохај, веќе имаат договор со потенцијални оператори. Тие дизајнирале неколку електрични модели, а изградиле само еден прототип.

Станува збор за леталото именувано „алис“, кое собира девет патници и со едно полнење на батеријата поминува нешто повеќе од илјада километри. Дури 65 отсто од масата на авионот се литиум-јонски батерии. Најголемата брзина што ја достигнува е 440 километри на час, а тоа е дупло помалку од класичен авион. Оддалеченост од 150 километри „алис“ би ја поминал за дваесетина минути.

Пазарот за електрични авиони пораснал за 30 отсто во споредба со лани, а моментално има стотици различни проекти во светот кои работат на развој на електрични летала, пишува „Блумберг“. На пример, „Зунум Аеро“, компанијата зад која стојат „Боинг“ и „Џетблу ервејс“, сака до 2022 година да развие хибриден патнички модел на авион.